Шежіре! Еш уақытта мәнін жоймайтын ұлтымыздың ауыз әдебиеті. Үлкен аталарымыз арамыздан кеткелі сан ғасырлар өтсе де, есімдері ел есінде сақталып, жаңғырып келеді. Өйткені, оларды өмірге қайта оралтатын бүгінгі жас ұрпағы бар. Келешегі бар елде тарих ешқашан ескірмейді, өшпейді. Орта
жүз Найманның Жеті Байыс тармағына жататын Байғана руы тарихи шежіресінің нұсқасы ұсынылып отыр.
Аманкелді Бөгісұлы
Тамырлы тастүлектер
Адамзат ұрпағымен мың жасайды
Тебіреніс: дана ойлы бабалар қазынасы жайлы ой-толғау.
Кәрі тарих қойнауына бойлай шеру тарта отыра Байғана бабамнан бастау алатын игі жақсылардың есімі оралымды ойға оралды. Елге тұтқа болған сол жайсаң жақсылардың бақ-дәулеті соңдарынан келген бүгінгі ұрпаққа дарып, жарықтықтардың рухы арқылы келетін көмескі күш қолтықтарынан демесе екен,салтынан ажырамай, отбасындағы әдет-ғұрпын жоғалтпаса, тәубесінен жаңылмаса деген тілектестікпен шежіреге толы осы еңбегімді "Тамырлы тастүлектер" деп атауды жөн көрдім. Тебіренудегі мақсатым-сан жүздеген кейіпкерлердің есімін қаздай етіп тізіп шығу емес. Ондағы ойым, арманның ақ сұңқарына құлаш сермеген, Отанын сүйетін, халқының арман-тілегін, салт-санасын білетін өршіл пиғылдағы ұрпағымызды тұжырымдап жазу. Олар өткені арқылы қадірлі қарттарымыз болғанын, құтты салтымыз бар екенін, төскейімізге төрт түлікті мал өрбіткен рухты, ғажап тілді халық екендігімізді әрдайым сезініп, жадында сақтаса екен.
"Тегін білмеген тексіз" деген бабалардан қалған асыл нақыл намысымызды қамшылап, тамыры тереңде жатқан, бірақ бүгінгі жаңа ұрпағының болашағы жарқын Байғана елінің тарихи шежіресіне ден қойып отырмыз. Өйткені, алдыңғы "Алыстан жеткен сарын" кітабымызда: - тегін білу-тектілік.
Страницы: 1